ගලයි උඩු අතට
බොර කරන් ගං දිය
මහා හඩ නංවගෙන
ළය පැලී මිය ගිය
අසෙකු දක්නට නැත
කපා හල කෙස්සක්
තැනින් තැන විසිර ඇත
සුජාතා කෝ නුඹ?
ඇයි මෙලෙස මගහැර ?
නේරංජනා තෙර වෙත
නුඹෙ තලිය රැගෙන එව
දූවරුන් නවතා
මාර පුත් සපැමින
පුරුස මස්ගොබ උලුප්පා
දූෂණයකට සැරසෙන
වෙසක් සඳ පායා
රක්ත වර්ණව ගිනිගෙන
සොමිකැළුම් නවතා
ගිනි දළු එවා හිනැහෙන
තිස්තුන්කෝටියක් දෙවිවරු
සක්වල ගලෙන් පැනගෙන
කඩු සිපත් පිහි ගෙන
මරා දැමුමකට සැරසෙන
මේ විසල් මිහිකත
ඔසප් වී දගලන
රත් පැහැති ලේ ගඟුල්
තැනින් තැන මතුවෙන
මෛත්‍රී බෝසතුණි
මේ වරත් ඉවසන්න
කොතෙක් වලකාලුවත්
ඇගේ බුදුබව නියතය
No comments:
Post a Comment